مرة ثانية يدخل الشيطان بين الحاج أبو فايك والحاجة أم فايك. كِلْمِة منها كِلْمِة مِنُّوا وِقِع الشَّر بينهم استخدمت بينهم كل أنواع الصّرامِة وِالحَفَّايات لِمْقَطَّع وِالقديمْ وِلِجْديدْ وِلْحَكي كُلُّو مْنِ الزِّنَّار وْتِحِتْ، إشي بِيخْزي فَرَّجوا عَحالْهُم اللي بِيسْوا واللي ما بيسواش، يعني وَلا المعارِك الدّايْرِة بْسوريا، يِكفيكو شرهم. أبو فايك قَبَّعَت معاه، حَمَل الجَنبِيِّة اللي بينام عليها وقام من جنب إم فايك من سِدر الغُرفِة الوحيدِة اللي مْتاويتْهُم، وراح فَرشها عنْد عَتْبَةِ الباب، يعني بْعيد عَنكوا عِنْد الصَّرامِي والشباشب لِمْقَطَّعة بَسْ وَلا جَنب إم فايكْ. واتفرَّجوا عاد لما الانسان بيتْسَرَّع وبوخِذ موقف ما إلو خط رَجعَة آمِن، كيف بيصير طعم العيشِة والصراع الداخلي مع حالو وْمَع اللي حَواليْه كمان، وإم فايِك زي اسرائيلْ نايْمِة على جُوزْ قَصْ، كل الورَق الْكَسْبانْ بيدها، وعارفِة إنو روح أبو فايِك معَلَّقَة بْدَبَديبْها وإنو الحياة جحيم بِدونها. وْمَرَّت أيام وْليالي وأبو فايِك لا ليلو ليلْ ولا نهارو نْهار، إشِي بِيْقَلْعِطْ، بِيتْقَلَّب على هالمِطقَعَة اللي نايم عليها يعني ولا نومِة الرِّعيان في البرِّيِّة أوذيب لاطي لَقَطيع نْعاج حَرْزانْ وخايِف يْروح مِنو.
شو بِدْكوا بْطولِ الْخُراَّفْ، وفي ليلِة من الليالي الطويلِة، وأخوكوا أبو فايك عيونو ما بيها نوم وما بيدو حيْلِة، قال في نَفْسُه الله يِخزيك يا شيطان، لَوينتا بِدي أظل راكب راسي وانا عارِف انها بِيتْحُطِّش واطْيِة لَحَدا، يا عمي مرتي عنيدِة وانا عارفها (طيب يا حبيبي ما دامك عارِفها لَليش تِتْنَطَّطْ وْتِتْحَطَّط قُداَّمْها)، أحسن شي أختَصِر وأبادِرْ من جانبي بالصُّلح، هُو حدا شايف، وْإذا كان بيقولوا البَلَد اللي ما بْتِعْرِف فيها شَمِّر واعْمَلْها فيها، كيف لما بيكون الأمر في دارو بينو وْبين مَرْتو، يا عمي الواحَدْ بينو وبين مَرَتوا فيش تكليف ولا كرامتي وكرامتَك. المهم، اتْنَحنَح أبو فايك وبَعَث تِغْريدِة لَإم فايك عالسريع: إم فايِكْ نِمْتِي يا حبيبتي ؟ لَع ما نِمْتِش ولا بدي أنام، شو دَخَلَك فِيِّي، انشاالله عُمُرني ما نِمِت، يعني كثير هامَّك (طبعاً هذا استهلال غير جيد لأبو فايك، يعني حديدِتها بَعِدْها حامية لَعِينْنْتِ الوالْدين).
أبو فايِك: طَيِّب مَعَلِش أنا عارفِك زعلانِة مِني وحقِّك عَلَيْ يا سِتي، شو رايِك تِخزي الشيطان وِاتجيبي فَرِشْتِك وْتيجي لَعِنْدي، وَلِك يا مَرَه احنا مالناش غير بَعَضْ، وْمِش ظايِل مِنِ العُمُر قَد ما مَضى يا وْلِيِّة.
إم فايِك: بِدِّيش آجي ولا بِدي أقرَبَكْ.
أبو فايِك: يا مَرَة وَحدي الله وتعالي الدنيا بَرِدْ بِيْقُص المُسمار وْبِيْخُرّ بِلِعْظام وْمع بَعَض أدْفالنا.
إم فايِك: أنا تا آجي لَعِنْدَك ما حَزَرِتْ، هذا عشَم ابليس بالجنة، بِدَّك تيجي إنتِ تَعالْ.
فقال: طَيب انتي بْتيجي لَنُص المسافِة وأنا لَنُص المسافِة وِبْنِلتقي بْنُص الطريقْ، وهيك بيكون عَدِل وْمساواة، مِش انْتِن بِيْتْطالْبِن بِالْمُساواة مُساواة وِلاَّ بَطَّلْتِنْ.
قالت: لا والله هاي مِنَّك وْوَرى، لَعْ مِشْ جايْ وَلا مِتْحَرْكِي من مُطراحي.
قال: طَيِّب شو رايِكْ إنتي بْتِقِلْبِي قَلْبِة وانا بَقْلِب قَلْبِة يعني مِني قَلْبِة وْمِنِّك قَلْبِة وْبِنْظَل نِتْدَحْدَل تا نِلتْقي وْيا دار ما دَخَلِك شَرْ.
قالت: لَأْ بِديش ومِشْ جاي، خَلَص حِل عني بِدي أنام.
قال محدثاً نفسه: (وبَعدين بْبِنْت هالحَرام شو بِدي أسَوي معاها، وًلْكُوا أقوم بها لِقْشاط أسَبِّغ جنابها والْعَن راس أبو اللي شار عَلَيِّي فيها، وِلاَّ أقَطِّع هالِعقال عليها والْعَن أبو الأساس اللي طِلْعَت مِنُّو، بَسْ ياعمي هاي بْتِفظَحنا إذا راحَت شَكَت لَلِجان المرأة وْجَنْدَر وْمِش جَنْدَر "إلهي يْجَنْدِر وِجْهِك يا بْعِيدي، وْمِشْ بعيدْ تِحْبِسني وِلاَّ تِخْلَعني حتى، طبعاً مهِي مُوظَة صايْرِة، يالله يا وَلَدْ غُلُب بِسْتيرِه ولا غُلُب بْفَضيحَة، وعلى راي اخواننا المصريين عَلْقَة تْفوت ولا حَد يْموتْ). ثم أردَف وقال: أقوللِّك، هايْ قَلْبِه عَنِّك وْهايْ قَلبِه عَني هاي قَلْبِه عَنِّك وهايْ قَلْبِه عني، وهكذا لَحَد ما وِصِل جَنْب إم فايِك وفَرَش المِطْقَعَة اللي نايم عليها جنبها، وْنام مِلءِ الجفونْ، وَلا تِحتْ ظِلال الزِّيزَفونْ، وْصَدَح بأغنيِة أليسا أبو فايِك الحَنونْ، "بِتمون عَ ضِحكي أنا بِتمونْ، بِتمون عالدمعة والك بِتْمونْ، ما بْخون لو حبَّك إلي بِتْخونْ".
يعني إحنا قضينا سنين عُمُرنا وْعُمْرِ القضية واحنا ساعة زعلانين ليش العَرَب مش واقفين معانا زي ما بدنا، وساعة زعلانين عالأمريكان، وساعة عالأوروبيين، وساعة عالروس، معقول مش فاهمين لَلْيوم إنو اللي بيجمعنا مع أي طرف منهم هِي المصالحْ، وَلكوا حتى إسرائيل مِش ممكن تِعطينا شي إذا ما جَمعنا معها مصلَحة مشترَكِة، يعني ما بِزْبُط نْقول بِدنا قُرْصِ مْقَرَّص من دَقْنِ مْعَرَّص، لازم نِخلِق هايِ المصلَحَة إلهُم معانا، وغير هيك عيش يا كْديشْ. وهذا قانون المصالح اللي بيحكم علاقتنا بأي طرف مين ما كان، يعني عرب وغير عرب، وبكفينا رومانسية ومثالية في السياسة والعلاقة مع الآخرين، كلُّو زي بعضو.
يا جماعة شو رايكوا نْوَحِّد الله وِانْجَرِّب نِعْمَل زي الحاج أبو فايِك بَلكي نِعرِف انَّامْ وِلاَّ نِهْجَع شْوَيِّهْ، وِانْصَحِّي القضية وْتِتْحَرَّكِلْها شْوَيِّ، وْنِخلَص من مْماحَكات وْلَعْبَنات صَفِيِّه الْمِشْتْفِيِّه، وْبَلا ما تِمشي من تحت اجْرينا المَيِّهْ، وِحْنا سارْحين في دُنْيا الْمَلَكُوتْ تايهين بينْ طاقَة وِلاَّ طاقيِّة. يعني السيد كيري وزير الخارجية الأميركية رايِح جاي عالمنطقة بيحاول يتوسَّط بينْنَّا وبين هالجَماعَة، وحاطِّينوا بين مِطْرَقَة وْسِندانْ، وِانتوا عارفين الجماعة راكبين راسهم ومن مصلَحَتهم يِفشَل هالزَّلَمِة وِيْرَوِّحْ علشان يِتْمَلَّصوا من المسؤولية، ومن أية استحقاقات تْعيدْهم لطاولة المفاوضات، مع قناعتي انهم يُدركوا أن جلوسهم للحق ولطاولة المفاوضات أمر حتمي لا بد منه عاجلاً أم آجلاً، مجبورين غصبٍ عن راس لِكبير قبل لِزْغِيْرْ، لكنهم يريدون الاستثمار بالوقت أقصى ما يستطيعون، وكل الأوراق الْمُمَكِّنِة بايديهُم وحدهُم، بس ما في طير بيظَل مْحَلِّق في السَّما طول عُمْرو لازم يِنزل عالأرضْ. وإحنا من جانبنا ما زلنا مكانك سِرْ وْبِنْشَرِّط زَيْهم، وْهُم مْكَيْفين علينا، مع فارق أننا خاليين الوفاضْ ما في بإيدينا شيء، يعني على فِيْض المَوْلى، وما تِنسوش اللي قاعِد بِيْصير فينا وْحَوالينا والمنطقَة كُلها معْفوسِة عن بكرة أبيها ويا عالِم وين رايْحَة تِسْتَقِر الأمور. يا جماعة من شان الله إذا هالزَّلَمِة بِدُّو يْمَدِّد مُهَلْ ما تِبخَلوش عليه مَدِّدولوا تا يِزْهَق وِيْرَوِّح إذا ما طِلْعِشْ معهم بنتيجِة، احنا عَليشْ خايفين طالما اللي خايفين عليه قاعدين عَليه والاستيطان جاري على قَدَمٍ وساق وبالتالي شَرْط وقف الاستيطان المسبق صار بيخدم الطرف الآخر أكثر ما بِيخْدِمنا وبْيِعطيه الوقت الأطول لاستغلاله بالبناء. وْهاي زي ما انْتوا شايْفين أعلن السيد كيري إنو الْهُوِّة ضاقَت بيننا وْبينهم. بعدين مِش دايماً المواقف بِتْكون اختيارية عالمقاس وبرغبتنا، فهناك مواقف بتكون اضطرارية وأهون الشُّرور وأخرى بتكون اعتراضية وليس للتنفيذ، خلونا نْجَرِّب طريقة أبو فايك لِيْمِيتِدْ مع إم فايِك طال مافيش إشي نِخْسَروا وْنتنياهو شَلْنا وْشَل أملنا وخلانا قاعدين بِنْقَصِّع قَمِلْ، والاستيطان داعِس عالصَّاجِة وْمستمر بينا وْبلانا، وطالما لم يعد عِنْدنا أية خيارات عاقْلِة وْمُمْكِنِة، سوى تلك التي ينتظرها الخصوم من أعداء السلام بفارغ الصبر لاستثمارها، وِاللي وفَّق أبو فايك مع إم فايك بَلكي يْوفقنا، وِاللِّي طَعْماه بِالمِعْلَكَة يْطَعْمينا بْذَنْبَتْها.
