اعمل "عبيط"

انتهيت من قراءة كتاب على شكل نصيحة للكاتب المصري المتعدد المواهب جمال الشاعر بعنوان" اعمل عبيط" والله إحنا العرب مساكين مشاكلنا شبيهة في بعضها البعض بس الأشكال بتختلف مع مراعاة الخصوصية، راح أحاول أسقط نصيحة جمال الشاعر على حالتنا الفلسطينية، ممكن النصيحة تزبط معنا.
اعمل عبيط وإنت عارف بأنه القضية مش قضية حكومة ولا رئيس وزراء، القضية قضية ما في نظام سياسي من أصله واضح، منظمة التحرير لازم تراقب الحكومة بتلاقيها في الحكومة، أعضاء مجلس التشريعي بتلاقيهم حكومة.... يا عم اعمل عبيط واحكي أصلاً هيك بتم مراقبة الحكومة من داخل الحكومة، والأخطر من هيك كله بتلاقي وزراء في الحكومة ممثلين عن أحزابهم بكون الوزير له رأي وحزبه له رأي مختلف والمواطن يا حرام يسمع مين والمواطن يرد على مين... "اعمل عبيط ولا تسأل عن أي تعديل وزاري ولا كيف جاؤوا ولا لماذا ذهبوا..."
اعمل عبيط وإنت بتشوف اللي لازم ينعمل ما بنعمل، لأنه اذا حكيت كمواطن بنرد عليك" وإن تشو دخل أهلك؟" حتى لو مواطن ولك حقوق وعليك واجبات اعمل عبيط وما تتدخل حتى يعني لو كان رأيك منقذ البشريه، لأنه انت غلط غلط... خلص بدك تعمل عبيط كمواطن يعني إنت غلط والمسؤول صح.... إفهم يا عبيط..... لو ما كان صح بكون مسؤول.
اعمل عبيط وإحكي أنا معاكم...أنا مع الأخضر والأصفر والأحمر والبرتقالي معاكم كلكم، حتى في اللون الواحد إحكي أنا مع أبو فلان ومش ضد فلان ولما يجيك فلان إحكي أنا معاك، كون مع الكل... كون مع الشرطي وبواب العمارة ومع شركة الكهربا ومع جارتك كون مع كل الناس اعمل عبيط، كون مع الجميع ولا تعادي الجميع، حتى مديرك كون معاه يا أخي ليش تخسرووو...اعمل عبيط واحكيله إنت الصح... أنت المؤسسه...أنت رئيسي وتاج راسي... إنت لازم تكون وزير... رئيس الوزراء...
إعمل عبيط وموت من الجوع إنت وأولادك لأنه الأسعار نار نار ...اعمل عبيط وما تسأل ليه بتدفع لقراءة عداد الماء 17 شيكلا على أساس إنه بقرأ القرآن مثلاً... اعمل عبيط وما تسأل ليه احنا في فلسطين أسعار الاتصالات الخلوية لا يوجد لديها مثيل في العالم...إعمل عبيط وحس حالك في نيويورك أو في روما....اعمل عبيط وإنت شايف الخضرة والفواكه أسعارها مثل أسعار اليورانيوم... إعمل عبيط وما تتدخل في القطاع الخاص كله... يعني إنت لشو بدك اتعب حالك خلص مش اسمه خاص.... يعني لا تتدخل لا في الخاص ولا في العام....إنت عبيط والعبيط ما بوجع راسه.
اعمل عبيط لما تعرف معاش مدير مؤسسة للشعب بالشهر _لأنها ملك الشعب مش ملك اللي خلفه_ قد معاشك سنتين اذا كان راتبك يا مسكين الف دولار وإعمل عبيط وما تعرف " البونس" كم باخذ ولا من صافي الأرباح ... وإحكي بطلعله ياخذ أكثر... كيف راح يعيش.... لا والأخطر بأنه كل اللي عنده بكونا عاملين عبيطين لأنه الكل بده مصلحته من الحصص، وأنا وإنت يا سيدي ويا ستي محسوبه علي وعليكي هذه المؤسسه لأنها مؤسسه فلسطينية، إعمل عبيط وإحكي يا رب يزيد معاشاتهم ويزيد دخلهم ويجوعنا ويطعميهم، ويلبسهم ويشلحنا ويشربهم ويعطشنا... إعمل عبيط وإحكي هذه المؤسسه فخر للشعب الفلسطيني الذي لا يعلم شو عم بصير في هذه المؤسسه مع العلم بأنها المؤسسه مؤسسته.
اعمل عبيط وإنت مريض وما في أدوية ولا علاج صح وقول وضع البلد صحي 100% أصلاً طوباس ما فيها مستشفى اعمل عبيط ولما أهل طوباس يموتوووو إحكي قضاء وقدر ولا اعتراض على مشيئة الله، اعمل عبيط لما تسمع خطأ طبي سبب وفاة إمرأة وإحكي يعني ما بدكم الناس تموت!! إعمل عبيط وإسأل في مسؤول مرض له طفل _الف لا قدر الله_ وجرب إحساس الأب المذبووووووح من التعب والنكد والحسرة على ابنه اللي ما بتلقى خدمة ورعاية على أصوله.
اعمل عبيط وأنت بتشوف الفجوة تزداد بين الطبقات إذا ظل طبقات، اعمل عبيط وتجاهل اللي بحبطك وبده يدمرك، إعمل عبيط وإحذر يكون عندك رأي أو موقف من قضية ما لأنك مراقب والعين عليك، إعمل عبيك وإنت بتشوف إختراق القانون بإسم القانون والفاسد بطلع نزيه والنزيه بطلع في السجن، إعمل عبيط اذا كنت حامل شهادات عليا وبتشتغل شغل ملهاش علاقه في الشهادة أصلاً، أعمل عبيط وما تتوتر كل ما اسمعت خبر مش صحيح...إتعود، إعمل عبيط وإنت بتشوف غزة لن تعود ولا القدس ومازلنا نبحث عن مصالحة!! إعمل عبيط إذا سألك أي شخص قرأت هذا المقال جاوبه فوراً: أنا مش عبيط عشان أقرأ هذا المقال.