اعتداء وقصف واعتقال واغتيال، والمناسبة عيد الاستقلال، استشهاد ودم وأشلاء في كل مكان، والحواجز الإسرائيلية بكل الأوقات والأزمان، طفل بيتحدى بسجان ومافي أغلى من الأرض وأرخص من الإنسان عند المحتل اللي لا بيرحم لا بشر ولاحجر ولاشجر هدا غير التجريف كمان، مرة نسمع بمفاوضات ومرة بتحدي وذهاب للأمم المتحدة رغم كل المضايقات، والمواطن محتار مرة بيشعر بهوان ومرة بعزة وافتخار، بس عالأرض على متر واحد مش حاكمين، ولا على حدود ومعابر مسيطرين، سلطة بتبذل جهدها لتيسر أمور هالمواطنين، منعيش على المساعدات الدولية والمتبرعين والدول المانحين، والانقسام سنة عن سنة بيزيد لا قادة ولا سياسيين ولا مفكرين قادرين ينهوه وكأنه مش حاسين ولا سائلين، ناس بتقول عن حقنا مش متنازلين وناس حاطة رجل على رجل وبتقول مجانين، كلها أحلام يقظة وآمال لطامحين، عمال فلسطينيين مساكين بيشتغلوا بمستوطنة ومش عارفين همي هيك بيخونوا الوطن ولا بدهم يعيشوا ويعيشوا ولادهم المهم مش سرقة ولا عمليات نصب وحركات الزعران ، ناس بتصنفنا إرهابيين وناس بيقولوا أصحاب حق ومش متنازلين، والكل على الرواتب مشغولين هالشهر حينزل بموعده ولا متأخرين، طب ياترى حينزل كامل ولا بالتقسيط بالشهر مرتين؟ مش مهم بطلت تفرق خليه يستنى صاحب البيت عالأجار واللي بالدين مطالبين، عالعموم مش حطول عليكم كل عيد استقلال وانتو سالمين،...وبالقدس عاصمة لفلسطين بالسنة الجاي إن شاء الله محتفلين
