بقلم – رنا عفو بشارة :
من مذكرات التوقيف والتحقيق من قبل شرطه الاحتلال الصهيوني بمناسبه احياء ذكرى اغتيال الفنان ناجي العالي وتكريمه بعملي الفني ناجي العلي في قريه الشجره
الشرطي : (يهودي بحكي عبري) : من وين انت ؟
انا : من ترشيحا
الشرطي : اه من معلوت ترشيحا يعني ؟
انا : طبعا لا ، انا من قريه ترشيحا في فرق كبير ، معلوت مستوطنه على ارض ترشيحا !
الشرطي : نظره استغراب وازبهلال ... اها !!! مش عاجبه الاخ !
انا : طيب انا شو تهمتي وليش جايبيني لهون تسألوني من وين انا ما إنتوا بتعرفوا احسن مني !
الشرطي : إنتوا نظمتوا مظاهره غير قانونيه وبدون إذن الشرطه .
انا : لا احنا ما نظمنا شي ولا عملنا مظاهره ولا مسيره ، احنا اجينا نزور اراضينا وأهالي البلد اجو يزورو قبور اجدادهم الى ما ضَل منها شي الي مستوطنه ايلانيه محت كل معالم القبور فيها ! بعدين هذا تاريخ معروف ما حد دعا حد
الشرطي : طيب ليش ما طلبتوا إذن ؟
انا : ليش انت لما تروح تزور قبر قرايبك بتطلب إذن من الشرطه ؟ وعلى كل حال انت من وين ؟
الشرطي : بنظره استغراب واستهجان دائمه !
لا ما بطلب ، انا من بيسان !!! معناها باب الجنه في العبري !
انا : اها منيح عارف اسمها بالعربي ، بس انت من وين اصلك ؟
الشرطي : انا من المغرب !!!!!
انا : بس ملاحظه جانبيه بيسان كثير حاميه بتحرق حرق بالصيف ...
وبعدين خساره انك تركت وطنك الام المغرب !!!
الشرطي : خلينا نرجع لسؤالنا ليش ما طلبتوا إذن للمظاهره ؟
انا : احنا مش بحاجه لأذن لنروح نقرا الفاتحة ونصلي على قبور اجدادنا في قرانا المهجرة ! وبعدين هذا تاريخ معروف الكل بيجي يزور فيه قبور اجداده وبيوته واراضيه المهجرة !
طيب ليش ما اعتقلتوا اي حد من المستوطنين اليهود بعد كل الي عملوه فينا ؟ من شتائم والفاض نابيه وهجوم بالكلاب وإزعاج بالتراكتورات و بالسيارات وتصوير وكلام من الزنار وتحت ؟؟؟
الشرطي : ما إنتوا ما طلبتوا إذن !!!!!
انا : اهااااا يعني احنا حتى لو متنا ما كنتوا لتدافعوا عنا ؟
الشرطي : ما هو ولا حد مسّكم ولا حد قرب عليكم !ما حد اتصاوب منكم !
انا : اها فهمت عليك هههه!!!! يعني انت بتستنا لحتى يصير شي بس بتقصد عن الشي الجسدي اذا فقط تم الاعتداء علينا جسديا كنتوا رح تفصلوا بينا !
، يعني احنا شعب بدون حمايه ومواطنين درجه عاشره ، على علمي إنتوا بلد ديمقراطي !!! وبلد كل مواطنيها وبتدافعوا عن الجميع مفروض !!!
الشرطي : طبعا دوله ديموقراطية ! طيب نرجع لموضوعنا ليش جيتو هون ؟ انتو استفزيتيوهم فتوا على ارضهم !
انا : ارضهم ؟؟؟ انت عارف انها بلد محتله وهون كانت الشجره بلد ابو عرب وناجي العلي الف رحمه لرحها ! زي باقي ال ٥٣١ !!!
الشرطي : طيب تخيلي انت قاعده في بلدك وببيتك وإجا مجموعه مستوطنين مع علام إسرئيل وصاروا يتهجموا عليكم ؟ شو بتعملوا ؟
انا :ممتاز كثير خليني اقلك شي ، انا يوم السبت او الأحد بكون قاعده بترشيحا على الشرفه تبعت بيتي، وما بحس واذ بمجموعه كبيره من المتقاعدين مع (مرشد ) بشرحلهم بالعبري عن ترشيحا وانا بستغرب ! وبقول بعقلي عن شو بحكيلهم يا هل ترى ؟؟؟؟ احنا ما منهاجمهم زي ما هذول المستوطنين هاجمونا وشتمونا وافلتوا علينا كلابهم بس انا احنا شعب راقي مش زيهم !
هذول المتقاعدين مش حاملين اعلام اسرائيل !!! بس هم حاملين مايكروفون !!! وبزعجونا بطريقه اصعب من الاعلام بقلب بلدنا ويكذبوا على حالهم ! تحت اسم السياحة الداخليه
بس هيك !!!!
(علما انني أنغّص على هذه ( الزيارات السياحية )في كل مره اراهم يصولون ويحولون في شوارع ترشيحا ويمتعضون من ملاحظاتي التي طبعا لا ولن تعجبهم)
مشهد واحد من عشرات المشاهد السرياليه
المكان : مركز التوقيف في ما يسمى بشرطه طبريا
الزمان : ٢٠١٥.٨.٢٨